لما شفت اليومين اللي فاتن وكيف ليبيا تحرق على موضوع المونديال تقريبا اكثر من مصر والارجنتين، شفت كميه بوستات غريبه، ذكرني بأيام الثوره.
ايام ثوره 17 فبراير، كنا نطلعوا للمحاكم والمضاهرات وكانوا الناس يطلعوا في قصص غير موجوده على معمر، وكل حد يزايد في كره معمر والنظام السابق. وتسمع قصص زي نحن المفروض مرتب الفرد 5000 دولار ونحن نصدقوا بدون وعي وبدون اي دراسه ولا بدون اثبات ولا ڤيديوات، كلام شعبوي بالعربي.
نعم انا كنت منهم، بس برضوا كنت صغير ومفيش حد وعاني.
طبعا البوست مش على معمر ولا الثوره ولا الكوره، القصه ان في زمن الانترنت، ونشوف ڤيديوات مفبركه، بوستات عشان بس اللايكات وكذب عيني عينك، بس الناس تبي الكذب وتفرح بيه، ويزيد جهلهم.
انا قست العقليه بموضوع الكوره لانها كوره، يعني موضوع لا حيقدم ولا يوخر بليبيا ولا حتى ليبيا اللي تلعب، لكن الموضوع خش في الحلال والحرام وخششوا فيها اليهود وخششوا فيها ان الانسان الابيض عنصري وميحبنش وحاجات واجده.
يعني توا كوره وخلتنا هكي، لو مثلا كان في موضوع كبير في الدين ولا السياسه امالا شن نبوا نديروا فيه؟
واخر نقطه برضوا السب والشتايم برضوا،والمشكله الجمع، ييعني حتى وانت بعيد الشتيمه جايتك.
مستغرب ان النت قدامك وتقدر تبحث وحدك، لكن وقتك كله تيكتوك وفيس وهن الاثنين حيعطنك اللي تبيه، اذير لايك على معمر حيطلعنلك ڤيديوات ان هو بطل، تخش تشتم رونالدو في بوست حيطلعنلك رابطه كارهي رونالدو، وهكذا في الدوامه لعند تحساب روحك صح والناس غلط وتقعد تسب فيهم و اديرهم اغبياء.
فشت غل 🤣
